ارض النفاق - الأنسان

المنافقون يمتنعون

فى احد افلامنا العربية للاستاذ فؤاد المهندس وكان اسمة ارض النفاق ويحكى عن مخترع تمكن من اختراع حبوب لعلاج كل عيوب المجتمع ومن ضمنها كان النفاق ومن خلال هذا الطرح الكوميدى تمكن المؤلف ان يثبت ان مجتمعنا كلة منافق وفى فيلم اخر سمعنا ياعزيزى كلنا لصوص واذا كان الفن لسان حال الامة فهو يقول لنا اننا جميعا فاسدون ومع اختلاف الفكر والتوجهات نجد انهم على حق فمن منا لايكذب يوميا بداعى او بدون داعى ومن منالا ينافق تحت بند المجاملة او الاتيكيت .

ولنضرب مثالا لما نراة من عيوب مجتمعية فى عالمنا العربى سنتصور احد الزعماء الذين نهتف لهم بالروح بالدم نفديك يازعيم ماذا يحدث لة وللناس لو اعطيناهم حبوب الصراحة مثلا: لنرى خطابة للشعب اولا

ايهاالشعب ....

ياحثالة شعوب الارض لقد فاض الكيل منكم فانتم لا تشبعون ولا تشكرون حكمتكم بالحديد والنار وحكمت على الفقرا منكم يموتوا من الجوع رحمة بهم وسخرت وزرائى يستوردوا لكم الاكل المسرطن وسقيناكم ماء ملوث وجبنا لكم الامراض الحديثة من باب تحديثكم

واختارنا اوسخ ناس فيكم علشان يتحكموا فيكم وعملناهم محافظين ووزراء وهما زبالة علشان نرفع مستواكم الاجتماعى وتوسعنا فى الكوسة والواسطة والمحسوبية علشان تحبوا بعض وتساعدوا بعض وخلينا لكم نواب فى البرلمان هما صحيح من كلابنا بس اهو اسمهم بيمثلوكم وكل يوم نعمل لكم فيلم ونغير فى الدستور والاحكام من باب التغيير.بس الغريبة انكم شعب ناكر للجميل وربيتوا لى القلق كل يوم لكم طلبات جديدة وانا زى مااكون خلفتكم ونسيتكم

ماتولعوا بجاز اللى عاجبة يعيش تحت جزمتى يعيش واللى مش عاجبة ينفلق انتم عارفين الداخلية بتاعتى ايديها طايلة والقضاة بيسمعوا الكلام ومن النهاردة مافيش حاجة اسمها مسجون سياسى يعنى هى قضايا المخدرات والدعارة والتزوير خلصت من البلد لما نعمل منكم ابطال وشهداء ياكلاب واحنا عندنا تصريفات كثيرة علشان نخلص منكم ومن قرفكم عندنا حوادث القضاء والقدر بتحصل كل يوم فى الطيارة والعبارة والقطار يعنى فى اى لحظة هاتلقونى كاتم على انفاسكم انا وملك الموت . علشان تعرفوا مدى رحمتى بيكم . ورجالتى معاهم تصريح منى بتخفيف معاناة الشعب يعنى التعذيب فى السجون هيبطل علشان جماعات مناهضة التعذيب والجماعة بتوع حقوق الانسان واهونشغل عشماوى شوية التعذيب دة اصبح موضة قديمة دلوقتى عندنا( التوسيخ )ودى الموضة الحديثة فى فنون التخلص من المعارضة يعنى لو واحد فكر بروح امة انة يعمل فيها ريس ويصدق نفسة ويترشح ضدى هااخلية يبوس الجزم علشان ارحمة واختار لة نوع كويس من الوساخة

و لوواحدحب يعمل فيها زعيم للمعارضة هنفصل لة مصيبة من النوع المفتخر والخاص وهااورية النجوم فى عز الظهر كل دة علشان تعرفوا مدى رحمتى بالمعارضة وانى زعيم ديمقراطى زى ماهو من حق اى واحد فيكم يقول اللى يعجبة ويعارضنى انا كمان من حقى انى البسة مصيبة واحبسة واودية فى ستين داهية هو واهلة وفيها اية لما اتنين ولا تلاتة مليون منكم يغوروا فى داهية ماانتم اكتر من الهم على القلب ومش فالحين غير فى زيادة النسل.عملت ليكم فضائيات علشان تتلهوا على عينكم وتقعدوا فى البيوت تتفرجوا عليها وتشوفوا النسوان المستوردة وتتلبخوا فيهم وتنسوا السياسة ماعجبتش عملت قنوات للمشايخ برضة ماعجبتش خليتكم تتكلموا فى السياسة وتشتموا الحكومة سيبتم كل دة ومسكتم فى سيرتى انا وعائلتى انتم ناس طماعة عينكم فى الكرسى بس دة بعين اللى خلفوكم

وفى نهاية خطابى اتمنى ان لااراكم لان ريحتكم وحشة وخنقتونى

هذا هو خطاب الزعيم وقريبا سنعرف رأى الشعب بعد تناولة حبوب الصراحة فانتظرونا