.
.
السبت, 12 مايو, 2007
رسالة الى عمنا احمد فؤاد نجم
انت فينك يافاجومى
ياللى منك شقيت هدومى
********
اصحى يا نجم كفاية نوم
قوم وغنى للى نايم
اصحى وأنفض ع الهدوم
فترة عدت وانت نايم
ربع قرن مالوش لزوم
واحنا بين تاية وهايم
احنا نغرق فى الهموم
وانت عايم
********
يعنى عاجبك حال بهية
سرقوا منها الجلابية
وسابوها عريانة
بتنادى اة ياانا
شنقوها بالطرحة
حرموها م الفرحة
بتنادى ياولدى
بتنادى ياسندى
********
وطالت النومة
وبكرة هنتورث
والكلمة مكتومة
وبلاش تقولى اخرس
********
مصر فيها كام مذيع
بس فيها كام فؤاد
مين هيندة ع الولاد
مين اللى هيصحى العباد
مين هيبقى كتفه مية
وكتف زاد
مين هيضرب البروجى
مين هيضغط ع الزناد
********
انت ....
عاجبك الشغل فى دريم
وانت هايص ف الحريم
اصلى عارفك
دايما فلاتى
ذوقك تملى
نسوان زواتى
********
اللة يرحم الشيخ امام
كنت ايامة تمام
بس انا شايف لك منام
الثورجى هيفضل
جوة منك
والثورجى هيفضل
جوة دمك
مش هتنفع اى حاجة
لا قهوة جى
ولا بوس طجى
غصب عنك
ماانت شاطر فى الكلام
********
اية حكايتك
وبعدين معاك
انت خايف م الحكومه
ولا فية حد وراك
بعدين ياكلك
على قف اااااااااااااااااك
********
احنا عايزينك غناوى
مش حكاوى شهرزاد
احنا عايزينك ياحاوى
مش هنقدر ع البعاد
الفاجومى
(25) تعليقات
<<الصفحة الرئيسية
.
.