.
.
الجمعة, 20 ابريل, 2007
ابنتى فى بلاط صاحبة الجلالة
قالوا بنتك اختاروها فى الصحافة
عملوا ليها فى الجرنان حكاية
ومسكوها صفحتين
الصراحة قلبى طار
من بين ضلوعى
بس خوفى
كان مخلى الفرحة ناقصة حبتين
كلمتين كان لازم انصحها بيهم
يابنتى مالكيش بالسياسة اى دخل
وابعدى عن التنين
اكتبى فى الموضة مثلا
ولا فى لبس الحريم
هاتى شيف من اى فندق
كلمية عن طبختين
السياسة يابنتى داهية
حرف ناقص او حرف زايد
يلبسوكى الف تهمة
ويحلفوا مليون يمين
قلبى وياكى ياعمرى دا انا عمرى
هاافضل اسال نفسى دايما
الصحافة داهية سودة
طلعت لك منين
اعذرينى حبى ليكى ماتعرفيش قد اية
خوفى من نفسك عليكى
وخوفى من عامل الوراثة
جة معاكى وانتى جنين
اصل طبع الاب يورثة الابن منة
بس انا حظى منيل
يورثوة البنات مش البنين
فى النهاية يابنت عمرى
لو جرى لك م الصحافة اى حاجة
مش هااسامح نفسى عنها
وهاالعنها واديها جزمتين
الصحافة مهنة عايزة راجل
مهما كان اهو اسمة راجل
يتحبس يتشتم اسمة راجل
مثل حظ الانثيين
أة يابنتى ... لما نادوا اسمك يكرموكى
قلبى كان طايرورفرف
زى عصفور بجناحيين
لما اعطوك الشهادة
وشفت فرحك كنت هااصرخ
واقف واقول دى بنتى
بس خفت الناس يقولوا
انت مين
يارب انت عالم
ان بنتى عمرها فى يوم مااكلت حرام
يارب خليك معاها و حافظ عليها
من ولاد الاكرمين
خلى بالك ياضنايا من ضميرك
واعملى اللى يقولك علية
واى شىء هتكتبية
مش هااقولك غير امين
مش هااغشك هاانصحك
لحد ماالزرع يقوى
لحد ماتعدى الطفولة
وتعرفى طريقك منين
خليكى ويا الحق دايما واكشفى بتوع المباخر والصاجات
اللى ما يخافوش من رب
قادر على كل العالمين
كنت قاعد وياامك تانى صف فى الكراسى
شكلى راسى بس حاسس انى طاير
قلت اسيبك للمعجبيين
صدقينى ماكنت شايف غير بنتى وبس
كان قلبى معاكى وروحى لامسة روحك
وفرحتى بيكى كانت هتنطق
م العنين
فرحتى بيكى طيرت عقلى وجنانى
فرحة عارمة وخوف شديد
بس قلبى كان مليان حنين
بادعى ليكى ربنا ييسر امورك
ويبقى قلمك نور يلالى فى ليالى
الغلابة المطحونين
الحياة يابنتى رحلة هتعشيها وتشوفيها
فرح هتلاقى حزن برضة فيها
بالستر يارب بادعى ليكى
ولجميع المسلمين
وكنت عايز اعرفك
ان الصحافة فى مصر
مش زى الدراسة دى نجاسة
واللى فالح فيها هو اللى حافظ
كلمتين
واحدة سيادتك والتانية عظمتك
وكل مايشوف ظل سيدة
يطبل يزمر
قبل مايبوس الايدين
السياسة فى الصحافة نفاق صريح
اى حد فى اى منصب مهما ينصب
يبقى باشا والبغاشا من نصيب
الطبالين.
ملحوظة لكل من سيقرأ هذة الكلمات انها لاتخص الا ابنتى وقد كتبتها عن تجربتى الشخصية وارجو ان تعذرونى على اى تجاوز فى التعبير او عدم التزامى بقواعد اللغة..
نجم
<<الصفحة الرئيسية
.
.